HERUSALEM, AP.- Dos palestino a muri djabièrnè den konfrontashon ku ehérsito israelí, segun informashon di Ministerio di Salú di Gaza, na momento ku presidente Mahmoud Abbas a pidi Fransia i Europa pa kumpli un ròl mas enérgiko den e proseso di pas despues di e rekonosimentu di presidente Donald Trump di Herusalèm komo kapital di Israel.
E violensia a tuma lugá siguiente dia ku Asamblea General di Nashon Uní a denunsiá e desishon di Trump.
Den un bishita pa Paris, Abbas a bisa ku lo no aseptá plannan di Merka pa pasa den Medio Oriente, konsiderando ku gobièrnu di Trump a tuma parti pa Israel pa loke ta status di Herusalèm, e asuntu mas delikado di e konflikto.
E bosero di ministerio di Salú di Gaza, Ashrafal-Kidra, a bisa ku dos hòmber, di 24 i 29 aña, a muri despues di a wòrdu tirá den konfrontashon serka di frontera ku Israel, i 45 mas a resultá heridá.
Ehérsito israelí a bisa ku míles di palestino a partisipá den “disturbionan violento” na frontera ku Gaza na Cisjordania, “tirando bòm i piedra i sendiendo tayernan na kandela” kontra sòldatnan. Ehérsito a bisa ku e sòldatnan a rospondé ku gas lakrimógeno, i ku munishon di guera “tirá selektivamente kontra e insitgadónan prinsipal”.
E konfrontashonnan a multipliká desde anunsio di Trump riba Herúsalèm dia 6 di desèmber, ku un saldo te ainda di 10 palestino morto i desena di herido.
