SAN DIEGO, AP.- Korte Supremo a ninga di konsiderá e pedido inusual di gobièrnu di Donald Trump pa e analisá e desishon di un hues ku a mantené e programa DACA na vigor. Esaki ta duna kasi 700.000 hóben pèrmit pa keda den e pais, ya komo ku nan a wòrdu tres’é ilegalmente desde mucha.
E desishon ta impliká ku DACA ta keda na vigor pa por lo ménos algun luna, i posiblemente mas despues di elekshon di mitar término di novèmber. Den sèptèmber, gobièrnu a bisa ku lo suspendé DACA, indikando ku e ta un abusu di poder ehekutivo i a duna Kongreso te 5 di mart pa resolvé e status di e inmigrantenan.
Hues William Alsup, di San Fransisco a bisa dia 9 di yanüari ku e gobièrnu no a hustifiká e suspenshon di e programa debidamente. E gobièrnu a wòrdu obligá pa sigui aseptá solisitutnan di renovashon, ounke no pedidonan nobo.
E hues di distrito di New York Nicholas G. Garaufis a emití un desishon similar den febrüari.
Den yanüari, Trump a proponé pa duna siudadania na 1,8 mion inmigrante hóben komo parti di un reforma di lei di inmigrashon ku a inkluí 25.000 mion dòler pa konstrukshon di un muraya na frontera ku Mexico i otro medidanan pa reforsá vigilansia den e sektor aki. Senado a rechasá e inisiativa.
Aktivistanan ku ta defendé e kousa di e inmigrantenan i nan aliadonan den Kongreso kier un reforma mas limitá, ku ta protehá e hóbennan ku DACA, posiblemente kombiná ku medidanan pa reforsá e vigilansia na frontera, pero gobièrnu no ta aseptá esaki. Trump ta responsabilisá e demókratanan pa e situashon stanká aki, miéntras ku esakinan ta afirmá ku e problema a krea su mes dor di suspenshon di DACA.
Kongreso mester aprobá un proyekto di gastu pa 23 di mart pa gobièrnu sigui operá, loke ta duna e demókratanan posibilidat pa supeditá nan sosten tokante DACA. E demókratanan a obligá pa suspendé e operashonnan di gobièrnu den yanüari ku e intenshon aki.
