QUITO, AP.- Korte Nashonal di Hustisia di Ecuador a ordená pa vinkulá eks presidente Rafael Correa na un proseso penal pa e sekuestro di un eks asambleista di oposishon.
Hues Daniel Camacho, na kargo di e kaso i kende ta akus’é di asosiashon ilegal, a pidi e presensia di e eks gobernante kada 15 dia den Korte Ekuatoriano, ounke Correa ta biba na Bèlgika.
E eks mandatario tin te ku 18 di yüli pa presentá pruebanan di deskargo.
E polítiko opositor Fernando Balda a wòrdu sekuestrá na 2012 na Bogotá pa delinkuentenan komun kolombiano kontratá pa agentenan di inteligensia ekuatoriano. E eks asambleista a hui pa e kapital kolombiano buskando refugio den un supuesto persekushon di e gobièrnu di Correa.
Fiskal a señalá ku el a haña indikashonnan ku e agentenan a wòrdu pagá ku fondo di presidensia.
Correa, kende a goberná Ecuador entre 2007 i 2017, a ninga e señalashonnan.
“Mi no sa dikon mi ta wòrdu vinkulá, ni pa kiko mi ta wòrdu vinkulá ku e kaso”, asina e eks mandatario a señalá riba su kuenta di Twitter. Desena di siguidó di e eks mandatario a kongregá dilanti di Korte Nashonal pa asina sosten’é.
E situashon a kuminsá seis aña pasa, na momentu ku Balda tabata un kritiko fuerte di Correa, kende su régimen tabata keda akusá di korupshon, miéntras ku e eks mandatario a señal’é komo outor di un trampa pa kit’é di su puesto komo mandatario.
Na momentu ku e tenshonnan a krese, Balda a refugiá na Colombia, kaminda deskonosínan a purba sekuestr’é den ougùstùs 2012, pero el a salba na último ora danki na intervenshon di un grupo di taksista ku a alerta polis i a neutralisá e vehíkulo kual e polítiko ekuatoriano a subi aden.
E investigashonnan hudisial den e pais a determiná partisipashon di e agentenan polisial ekuatoriano den e sekuestro di Balda.
