QUITO, AP.- Ecuador ta rekerí 550 mion dòler pa atendé ku e fluho migratorio di venezolanonan ku ta hui di e situashon di krísis den nan pais. Asina e vise minister di Mobilidat Humano, Santiago Chavez, a indiká.
El a informá ku e sifra ta debí na un estudio realisá ku ministerionan di Salú i Edukashon, entre otro. E ministerionan mester konfrontá e emergensia deklará den tres provinsia ku a haña un kantidat enorme di migrante. Ta trata di Carchi, na frontera ku Colombia, Pichincha, kual su kapital ta Quito i tambe El Ora, kual ta keda na frontera ku Perú.
Tabatin un enkuentro di 13 pais den e kapital entre djaweps i djabièrnè. Ocho a aseptá un deklarashon pa duna atenshon prioritario na e fluho di venezolanonan, yuda nan den nan proseso migratorio i proveé atenshon integral na e migrantenan.
Mas o ménos tres mil venezolano ta krusa Ecuador, prosedente di Colombia. E venezolanonan ta kana durante vários siman, ku e propósito pa yega Perú, Chile òf Argentina segun indikashon di outoridat.
E aña aki e travesia di e venezolanonan tabata mas konstante, debí ku míles ta di hui di e krísis ekonómiko profundo riba nan Tera.
