EL CAIRO, AP.- Algun di e víktimanan di e avion di EgyptAir ku a kai na mei pasá tabatin rastronan di eksplosivo, asina outoridatnan na Egipto a informá.
E avion ku tabata bin di Paris a kai den laman Mediteráneo na mei i 66 persona a muri. E suseso a sosodé shete luna despues ku den pleno buelo un avion ruso a eksplotá riba e península di Sinai den un atake ku e grupo ekstremista Estado Islámiko a hasi.
E ministerio di aviashon sivil di Egipto a informá ku ta kuminsá ku un investigashon relashoná ku buelo 804. Niun hende a tuma kulpa di aksidente di e avion ei. E avion un Airbus A320 a kai ora e tabata yegando kosta di Egipto.
E agensia di investigashon aéreo di Fransia a determiná ku e detektornan di huma a aktivá den e último momentunan di e buelo 804. E bosero Sebastian Barthe a bisa na AP algun luna pasá ku esei ta indiká ku tabatin un kandela. E publikashon espesial Aviation Herald a reportá ku e sènsòrnan a detektá huma den baño di e avion i fayo di dos bentana di kabina den e último instantenan di e buelo.
Fransia a kuminsá un investigashon penal na yüni riba loke a sosodé. E atake kontra e avion ruso a sosodé na òktober 2015 i den dje a muri 226 persona i a sòru pa kanselashon di vuelonan i tambe un gòlpi duru na ekonomia egipsio espesialmente e sektor di turismo ya debilitá pa e instabilidat polítiko despues ku a baha Hosni Mubarak na 2011.
Egipto nunka a determiná e kousa ofisial di kaida di e avion ruso. Rusia ta bisa ku eksplosivo a eksplotá den e avion.
