PARIS, FRANSIA, AFP.- Iran a ehekutá e di dos persona kondená pa su partisipashon den protestanan ku a sakudí e pais desde sèptèmber, apesar di indignashon internashonal pa aplikashon di pena kapital pa esnan impliká den e manifestashonnan.
Majidreza Rahnavard, di 23 aña, kondená na morto pa un korte den siudat di Mashad pa mata dos miembro di forsa di seguridat i heridá kuater persona, a keda horká den públiko i no den prizòn, segun indikashon di e agensia di informashon Mizan Online.
Ta trata di e segundo ehekushon, i e promé ehekushon públiko relashoná ku e protestanan pa morto di Mahsa Amini riba 16 di sèptèmber. Amini, un hóben kurdo iraní di 22 aña ku a muri despues polis di moral a deten’é pa infrakshon di e kódigo estrikto di vestuario di e Repúblika Islámiko.
Mizan Online a publiká imágennan di e ehekushon di Rahnavard, kaminda por mira e hòmber ku su man mara tras di lomba i kologando na un kabuya mará na un kran.
E famia no tabata na altura di e ehekushon, i a haña sa di e proseso te despues di esaki.
E último ehekushon a sosodé den sirkunstansianan “partikularmente kruel”, segun indikashon di e sekretario general di Nashonnan Uní Antonio Guterres.
