QUETTA, PAKISTAN, AP.- Un eksploshon poderoso den un moské na sùitwèst di Pakistan djabièrnè a mata un polis i por lo ménos 13 sivil, segun informashon di polis.
E eksploshon a heridá 20 persona mas den siudat di Quetta, e kapital di provinsia Beluchistan, segun indikashon di e hefe di polis, Abdur Razzaq Cheema.
Vários di e heridonan tabata den kondishon kritiko i outoridat di e hospital a teme ku e kantidat di morto lo oumentá.
Outoridat ta sospechá ku e polis asesiná tabata e motibu pa e atake, pero ainda ta investigando e echo, segun indikashon di polis Mohammad Ajmal.
Promé minister Imran Kahn i e hefe di gobièrnu di Beluchistan, Jam Kamal Khan, a kondena e atake. Ehérsito di Pakistan a bisa ku a desplegá diferente sòldat na e sitio di e atake pa yuda outoridat ku e sivilnan.
Niun hende òf grupo a atribuí responsabilidat pa e atake.
