BOGOTA, COLOMBIA (AFP).- Desendientenan di e gueria FARC, ku ya no ta eksistí, a rementá eksplosivonan serka di un instalashon militar den e siudat di Cali, afektando vários kas di militarnan i di sivilnan. E karga tabata skondí den un trùk i a keda aktivá djaweps anochi 22:20 pegá ku muraya ku ta rondoná Canton Militar Pichincha, esun mas importante den zùitost dje pais.
“Danki Dios e dañonan tabata na e infrastruktura, na e kasnan, no tin personanan leshoná te na e momento aki”, segun e general Erik Rodriguez Aparisio, komandante di ehérsito den e region.
Rodriguez a atribuí e atake na Estado Mayor Central (EMC), e fakshon mas grandi di e rebeldenan ku a rechasá e akuerdo di pas di 2026 ku a desmobilisá FARC.
E vehíkulo tabatin sinku silinder eksplosivo. E guerieronan “a laga e vehíkulo yega serka dje instalashon militar pa e ora ei aktivá un karga ku a lansa e silindernan te parti paden dje base. “Ningun dje silindernan a eksplotá, pero si a kousa daño na un biniendo i na un skol den e base”, segun e general.
EMC ta agrupá 3.500 kombatiente i ta mantené negosiashonnan tenso di pas ku gobièrnu for di kabamentu di aña pasá. Na final di mart, e asesinato di un lider indígeno a pone ku gobièrnu a suspendé den tres region di zùitwèst e palabrashon di pas ku tabatin ku e insurgentenan.
EMC ta kontrolá e rutanan di narkotráfiko den e fronteranan ku Ecuador i Venezuela, segun inteligensia militar. Gobièrnu ta rekonosé ku e rebeldenan a probechá dje periodo di pas pa hasi nan posishon mas fuerte.
