CARACAS, AP.- E promé mobilisashon opositor pa purba yega na e palasio di gobièrnu despues di protestanan antigubernamental di aña pasa na Venezuela no por a logra su ophetivo.
Armá ku eskudo i ekiponan antimotin, sentenar di polisnan i guardia nashonal a blòkia e avanse di un marcha di dòkter, enfermero i otro empleadonan di e sektor di salú djaweps. E manifestantenan kier a yega e edifisio pa eksihí mehorashonnan salarial pa enfrentá e krísis ku hospitalnan venezolano ta pasando aden.
E protesta a generá gran ekspektativa debí na e tenshon ku esaki a kousa den e pais, despues di e atentado ku drone di 4 di ougùstùs último. E atake tabata kontra presidente Nicolás Maduro durante un desfile den sentro di Caracas, un insidente ku a pone dieskuater persona den prizòn, entre otro un general i koronèl di Guardia Nashonal i un diputado opositor.
Vários dòkter i enfermero bisti ku unifòrm i paña blanku, a purba avansá pa un di e avenidanan den sentro, durante kasi dos ora pero sin logra. Forsa di seguridat a impedí ku e manifestantenan por a pasa.
Despues ku un representante di e visepresidente a akudí e protestá pa skucha e petishonnan i purba haña un solushon, e manifestantenan a retirá di e sitio pasifikamente.
“Nos no ta delinkuente. Nos a bin pidi presidente loke nos a pidi durante e 54 dianan aki”, segun afirmashon di Ana Rosario Contreras, presidente di Kolegio di Enfermero di Caracas, despues di sigurá ku apesar di akshonnan di forsa di seguridat, e empleadonan di e sektor di salu a keda riba kaya pa eksihí e gobièrnu pa atendé ku e krísis di e hospitalnan.
