CARACAS, AP.- E Fiskal General di Venezuela a anunsiá djárason ku kuater miembro di famia di un supuesto delinkuente kolombiano ku a paresé riba potrèt ku e lider opositor Juan Guaidó a muri.
Despues di anunsiá e mortonan, e fiskal general Tarek William Saab a informá na prensa ku, e hipótesis adoptá ta ku e tata, mama i dos miembro mas di e supuesto kriminal kolombiano Ivan Posso Pedrozo, alias “Nandito”, a wòrdu asesiná dor ku kier a purba silensiá e delinkuente i evitá ku e ta papia di e relashon di Guaidó ku e grupo. E delinkuente ta integrante di e organisashon “Los Rastrojos”. E funshonario no a presentá prueba pa e deklarashonnan aki i e no a indiká ki dia ni na unda e asesinatonan a tuma lugá.
E ekipo di Guaidó no a komentá mesora riba e deklarashonnan di e fiskal.
Presidente Maduro a revelá ku e gobièrnu tin “hopi prueba mas” kontra e lider opositor i a agregá ku tin diferente potrèt kaminda e polítiko ta paresé ku “kuater kriminal sumamente peligroso”.
