BUENOS AIRES, AP.- E eks presidente di Argentina, Cristina Fernandez a akusá su susesor, Mauricio Macri, pa somet’é na un “prekoushon polítiko” mediante e manipulashon di un hues ku a sit’é pa deklará pa e supuesto enkubrimentu di responsabilidat di Iran den atentado kontra un sentro huisio na 1994.
Fernandez a bisa den un rueda di prensa ku e vulnerashon di “garantia konstitushonal” i degradashon di demokrasia” a pasa meimei di un kampaña pa elekshon legislativo 22 di òktober kaminda e ta purba buska un asiento komo senador nashonal den representashon di e provinsia di Buenos Aires pa koalishon sentroiskierdista Union Siudadano.
Fernandez mester presentá dilanti di e hues federal Claudio Bonadio dia 26 di òktober komo sospechoso di a purba protehá iranínan akusá di atentado kontra e sede di Asosiashon Mutuo Israelí Argentina (AMIA) den Buenos Aires. Esaki ta loke fiskal Alberto Nisman a denunsiá na aña 2015 algu promé ku su morto. Su morto a pasa den sirkunstansianan ku ainda no a wòrdu resolvé pa outoridat.
