BUENOS AIRES, AP.- Un fiskal a pidi detenshon inmediato di eks presidente argentino Cristina Fernandez. E ta wòrdu akusá pa fungi komo lider di un sistema di rekoudashon ilegal di plaka a kambio di faboresé empresarionan ku kontrakt di obra públiko.
E fiskal di Kámara Federal, German Moldes, a respaldá e demanda ku e hues federal Claudio Bonadio a pone kontra e eks mandatario den sèptèmber. E senador aktual a wòrdu akusá pa delitonan ilegal, atmishon ‘rekompensa’ i soborno entre 2003 i 2015. E periodo aki ta inkluí su dos mandatonan i esun di su kasa Nestor Kirchner, kende a fayesé na aña 2010.
E mandatario a rechasá e akusashonnan i a denunsiá ku e gobièrnu di presidente Mauricio Macri kier perhudik’é.
Fernandez, di 65 aña, no por wòrdu detené debí ku e ta protehá ku su puesto komo senador. Bonadio a eksihí e legislador pa paga 100 mion dòler, kende e ta konsiderá komo un hefe di un organisashon ilegal, i a prosesá vários eks funshonario i empresario.
E solisitut di fiskal Moldes mester wòrdu analisá pa Kámara Federal, un tribunal superior di apelashon.
