DEN HAAG, ULANDA, AP.- E Fiskal di Korte Penal Internashonal a pidi detenshon inmediato di yu di defuntu diktador libio Moamar Gaddafi, resientemente liberá na Libia despues di mas di sinku aña den prisòn.
Fiskal Fatou Bensouda a pidi Libia “i tur estado pa detené inmediatamente i entreg’é” Seif al-Islam na korte.
Korte penal Internashonal no tin forsanan polisial i ta rekerí koperashon di otro estadonan pa detené e sospechosonan.
Bensouda a bisa den un komunikado ku e òrdu di detenshon emití pa korte na 2011 ta vigente ainda. Seif al-Islam ta akusá di asesinato i persekushon pa su ròl den un represhon di protesta violento kontra Gobièrnu den 2011.
Bensouda a pidi detenshon di un otro sospechoso libio mas, identifiká komo Al-Tuhamy Mohamed Khaled, kende ta keda buska den korte internashonal pa aktonan di tortura i persekushon tambe kometé na 2011. E paradero di ámbos hòmber no ta konosí.
Moamar Gaddafi tambe a keda akusá den korte pero finalmente el a wòrdu asesiná pa rebeldenan promé ku e por a keda detené i manda Den Haag pa enfrentá hustisia.
Libia no ta un pais miembro di korte. Konseho di Seguridat di Nashon Uni a pidi korte pa kuminsá un investigashon den e pais pa notifikashonnan di atrosidatnan realisá segun Gaddafi tabata purba yega na poder.
