BERLIN, AP.- Un dokumento ofisial na Berlin ta indiká ku e hòmber ku a kore hinka un outo den un multitut di hende intenshonalmente riba un merkado di Pasku den e kapital aleman, matando 12 persona, por a wòrdu detené promé ku e atake. Asina un funshonario haltu di seguridat a bisa djárason.
Outoridat ta eksaminando e posibilidat ku Polis na Berlin a skonde òf asta manipulá e informashon despues di e atake, asina Andreas Geisel a bisa, kende ta Minister di interior di estado di Berlin. El a bisa ku Gobièrnu a presentá un keho kriminal pa opstrukshon di hustisia, segun e agensia di notisia DPA.
E dokumento di novèmber ta revelá detayenan di vigilansia telefóniko i ta akusá e atakante Anis Amri di narkotráfiko na gran eskala, segun Geisel.
“Na opinion di ekspertonan, e informashon aki tabata sufisiente pa sigurá un òrdu di detenshon di fiskalnan”, asina el a bisa.
Outoridat a haña un segundo dokumento krea dia 17 di yanüari, pero aparentemente fecha riba promé di novèmber. E dokumento aki a menshoná narkotráfiko riba menor eskala na lugá di gran eskala.
Amri a wòrdu mata den un konfrontashon ku Polis Italiano kuater dia despues di e atake di 19 di dezèmber na Berlin.
