LONDON, AP.- Den un gòlpi nobo pa e gobièrnu britániko, e sekretaria pa desaroyo internashonal Priti Patel a renunsia djárason despues ku a Sali na kla ku el a reuní sin outorisashon ku polítikonan israelí, inkluyendo e promé minister.
Patel a renunsia despues di a wòrdu obligá pa keda sin bai riba un biaha pa Afrika i mester a paresé den ofisina di promé minister Theresa May na 10 Downing Street. Si e no a renunsia, kasi sigur e lo a wòrdu retirá.
E ta e segundo integrante di e gabinete pa renunsia den un siman, den un gobièrnu ku ta konfrontando un krísis, inkluyendo divishon tokante Brexit i revelashonnan kresiente di intimidashon seksual.
Patel tabata bou di preshon desde ku a revelá ku tabatin 12 reunion ku gruponan i funshonarionan israelí, inkluyendo e premier Benjamin Netanyahu, durante fakansi den Israel den ougùstùs i ku e no a informá May riba esaki.
El a diskulpa, pero despues ku detayenan di dos otro reunion a emergensia, May a disidí pa aktua. Den su karta di renunsia, Patel a bisa ku su kondukta “tabata bou di stándarnan di un sekretaria di estado”.
