CIUDAD DE GUATEMALA (AFP).- Un general akusá di genosidio di indigenanan su kaso a bai dilanti ayera na Guatemala, den e di dos proseso dje susesonan ku a tuma lugá durante e guera sivil (1960-1966) despues di kondena dje eks-diktador Efrain Rios Montt den 2013.
E general retirá Benedicto Lucas Garcia, di 91 aña i kondená anteriormente pa krímennan kontra humanidat, mester respondé na hustisia pa su papel den e matansa di mas di 1.200 indígena maya ixil entre 1978 i 1982, miéntras ku su ruman tabata goberná, e presidente Romeo Lucas Garcia. E último aki a muri na Venezuela den 2006.
E general ta keda akusá di genosidio, krímennan kontra di humanidat i desaparishon fòrsá, pa kua e por haña te ku 100 aña di prizòn. Awor aki e ta kumpli un kondena di 58 aña den un hòspital militar, for di unda el a komparesé den un konferensia di video pa e kaso.
“Mi ta desesperá”, segun e general a bisa na huesnan dje tribunal, sintá den un stul den su kamber di hòspital. El a hasi entrega di datonan personal, pero no a hasi mas deklarashon i esaki riba konseho di su abogado.
E abogado Nery Rodenas, hefe di derechinan Humano di arsobispado di Guatemala, a bisa na AFP ku “a warda mas ku 40 aña pa inisio di un debate hudisial ku tin komo meta pa nan rekonosé e echonan a base di pruebanan”.
Den e kaso, ku lo sigui te ku yu, lo presentá mas di 80 prueba di dokumentonan militar miéntras ku tambe 30 sobrebibiente lo presentá komo testigu.
E eksperto Bayron Garcia durante dje kaso a presentá informashon di restunan mortal den grafnan ku desena di kurpa ku impakto di bala i kimá. E kaso a keda suspendé despues di nuebe ora i lo sigui djaluna.
Luis Garcia tabata hefe di Estado Mayor General di Ehérsito i tabata plania i ehekutá desena di hende den e munisipionan di Santa Maria Nebah, San Gaspar Chajul i Juan Cotzal.
E poblashon maya ixil tabata keda akusá di ta sirbi komo base di apoyo di guerieronan iskierdista.
Den kareda di 1.300 indígena a muri den e matansanan ei, entre nan mucha, hende muhé na estado i ansianonan, segun Asosiashon pa Hustisia i Rekonsiliashon.
“Mi ta un héroe nashonal”, segun e general Luis Garcia, kasá i tata di shete yu, a bisa dia 25 di mart último durante di un oudiensia hudisial ku a keda suspendé debí na renunsia di su dos abogadonan.
E guera interno guatemalteko a laga komo 200.000 morto òf hendenan ku a disparsé, segun un komishon ouspisiá pa Nashonnan Uní.
