QUITO, AP.- Prokurador a presentá ayera un akusashon partikular den korte nashonal di hustisia kontra di vise presidente Jorge Glas i otro 17 persona mas pa presunto aktonan di korupshon relashoná ku e skandal di soborno di e empresa Brasileño Odebrecht.
E delegado sivil i penal di prokurador, Carlos Jurado a akudí na korte pa kumpli ku e prosedimentu ku tin di tuma lugá den kuater dia promé di kaba ku e plaso di investigashon fiskal di e kaso, ku ta involukrá tambe e eks kontroladó Carlos Polit e tio di e vise presidente Ricardo Rivera i otro funshonarionan di ménos puesto.
Despues di e medida di prokuraduria, korte nashonal mester evaluá e pruebanan presentá i disidí si e 18 personanan lo keda someté na huisio pa asosashon ilegal pa delinkuensia.
Glas a nenga insistentemente ku el a intervení den aktonan ilegal durante di su periodo komo minister òf komo vise presidente.
Djárason pasa e eks representante di Odebrecht na Ecuador Jose Conceicao dos Santos via di vidio konferensia a duna deklarashon for di Brasil kaminda el a konta ku luho i detaye i menshoná nòmbernan ku el a entrega 32.1 mion di dòler na intermediarionan i na funshonarionan públiko a kambio di sinku obra estatal grandi di infrastruktura. Sinembargo Odebrecht a rekonosé promé di a paga un suma di 33.5 mion dòler, un diferensia ku no a keda aklará ofisialmente.
Prokurador Diego Garcia a atvertí na ougùstùs ku e organisashon ei lo bai intervení den e kaso pa pidi pa drecha ekonomia di estado. Glas ta vise presidente di e mandatario Lenin Moreno kende a asumí e puesto na mei, pero ku a kita tur funshon ehekutivo di dje despues ku el a keda sospechá di korupshon. Glas a okupá e mesun funshon entre 2013 i 2017 durante atministrashon di presidente Rafael Correa i promé tambe e tabata minister di sektornan stratégiko di e mesun régimen.
