WASHINGTON ( AP).- GlaxoSmithKline LLC lo paga 3.000 mion dòler i lo deklará di ta kulpabel di promové dos remedi popular pa usonan no aprobá i pasobra e no a duna informashon importante di seguridat riba un di tres remedi, asina Departamentu di Hustisia a bisa ayera.
Tabata trata di e akuerdo mas grandi den historia di Merka, derivá di un froude, di e sistema di salú.
Huntu ku e kaso penal tin un akuerdo sivil den kua e gobièrnu a bisa ku e merkadoteknia robes di e kompania a inkluí ofresé e dòkternan fakansi den hotèlnan karu, biahenan di yag na Europa, giranan di konferenshanan bon pagá i inkluso karchinan di entrada pa un konsierto di Madonna.
E but kombiná, sivil i penal, di 3.000 mion dòler lo ta e kastigu mas grandi ku hamas un kompania di remedi a laga, asina James M. Cole, supsekretario di Hustisia di Merka a bisa. E korporashon a akordá tambe pa e wòrdu di monitor dor di funshonarionan gubernamental durante sinku aña pa trata di sigurá e kumplimentu di e empresa, asina Cole a bisa.
‘Mi ta bai ta bon kla, nos lo no tolerá froude den e sistema di salú’, asina Cole a bisa den un konferensha di prensa den Departamentu di Hustisia. E funshonario no a aklará si algun ehekutivo di e kompania tabata bou di investigashon. E kompania a deklará di ta kulpabel i un korte federal na Massachusetts mester aprobá e sentensia.
