MIAMI, MERKA, AFP.- E gobernador republikano di Florida i posibel kandidato presidensial, Ron DeSantis, a proponé un serie di lei pa “kontrarestá e influensia” di Beijing, spesialmente prohibiendo siudadanonan chines di kumpra kas òf edifisionan den su estado.
“Nos no ke e Partido Komunista Chines” na Florida segun DeSantis den un rueda di prensa, akusando e grupo élite merikano di ignorá e problema desde hopi tempu kaba.
Ron DeSantis a bisa ku su medidanan ta permití Florida pa kontrarestá e menasanan ekonómiko, stratégiko i di seguridat di parti di China.
Un di e leinan ta prohibí kompra di tur sorto di ‘vastgoed’ na Florida, pa esnan ku ta biba na China i ku no tin status di residensia permanente òf ku no ta merikano.
E ta limitá kompra di terenonan agríkola òf propiedatnan ku ta serka di instalashonnan militar i infrastrukturanan kritiko pa siudadanonan di seis pais mas: Rusia, Norkorea, Iran, Cuba, Venezuela i Siria, konsiderá komo “paisnan estranhero di riesgo”.
E pakete di norma a keda kritiká pa oposishon demókrata lokal komo deskriminashon.