MEXICO, MEXICO, AFP.- E presidente mehikano Andres Manuel Lopez Obrador a anunsiá ku djamars e lo papia riba e polítika di migrantenan ku presidente merikano Joe Biden, pa motibu ku nan por spera un avalancha di personanan indokumentá na frontera despues ku kita e restrikshonnan di e pandemia di covid e siman aki.
Den e yamada di video, ku lo tuma lugá mitar di kuater di atardi, nan lo trata tópikonan di migrashon, droga i koperashon pa desaroyo, asina Lopez Obrador a bisa den su konferensia di prensa diario djaluna.
Kas Blanku a ninga di konfirmá e video yamada aki.
E gobièrnu ta preparando pa kita Título 42, e norma adoptá pa èks presidente Donald Trump, ku a ninga entrada di migrantenan sin papel i sala tur ku a pidi asilo, debí na e emergensia di salubridat di covid-19.
Biden su gobièrnu posiblemente lo introdusí un otro medida, Título 8, kual ta sanshoná i deportá tur esnan ku krusa frontera ilegalmente.
Washington a enfatisá ku asta sin Título 42, frontera ta keda sera pa esnan ku ke drenta ilegalmente i ku e úniko forma pa drenta legalmente ta via un petishon di visa di asilo desde e migrante su pais di orígen òf sentronan ku a habri resientemente na Guatemala i Colombia.
