NEW YORK, MERKA, AFP.- Akusashon i defensa a presentá e argumentonan final den e huisio sivil kontra Donald Trump na New York, akusá ku violashon i difamashon pa un èks periodista i awor ta hurado mester disidí si ta kondená e èks presidente.
Jean Carroll, di 79 aña, a demanda Trump aña pasa bisando ku el a wòrdu vila den un paskamer den dékada di 1990. E èks kolumnista di e revista Elle ta afirmá tambe ku el a wòrdu difamá pa Trump despues ku el a hasi su akusashon públiko den un buki na 2019.
E hurado lo kuminsá deliberá desde djamars si ta duna Carroll rason den e demanda kontra Trump pa daño i perhuisio pa un montante no determiná. Segun Carroll e no por tabatin un bida amoroso normal despues di e atake.
Despues ku el a presentá su argumentonan final, e abogado di Carroll a pidi e hurado den tribunal federal na Manhattan pa deklará Trump responsabel pa loke el a hasi.
Trump, kende a ninga e akusashonnan repetidamente, no a paresé den korte durante di e huisio.
