QUITO, (AP).- E delegashon di Gobièrnu kolombiano i gueria di ELN a yega na un akuerdo pa protehá e poblashon, baha e tenshon di konflikto i desaroyá un trabou pa e kòmbersashonnan ku nan tin na Ecuador pa alkansá un eventual akuerdo di pas. Den un rueda di prensa Juan Camilo Restrepo hefe di e delegashon gubernamental a sigurá ku e enkuentronan a kuminsá duna resultado konkreto a base di e akuerdonan i kompromisonan loke no ta algu ménos. Nos ta kòrdá ku e negosiashonnan di pas ku forsa armá revolushonario (FARC) a tuma kasi sinku aña i nos tin seis siman. E komandante i lider di e delegashon di ehérsito di liberashon nashonal (ELN) Pablo Beltran a destaká ku ta nesesario protehá e poblashon sivil pasó 160 lider sosial i ambiental a keda asesiná e aña aki i ta rekerí e gobièrnu pa buska medida pa evitá esaki. E komandantenan di FARC Pastor Alape i Carlos Antonio Lozada di e delegashon di pas di e grupo aki a bin hasi un interkambio ku e delegashon di pas ELN. Ta promé biaha ku esaki ta sosodé i pa nos ta hopi importante pasó e ophetivo ta sinkronisá e dos prosesonan, asina Restrepo a agregá sin ofresé mas detaye. Entre e temanan ku ta sigui tin e partisipashon e sosiedat sivil di e rebeldenan, e protekshon di e poblashon di e akshonnan armá i avansá pa programanan piloto di desaktivá minanan ku e partisipashon di e militarnan kolombiano i di e guerieronan di ELN. Restrepo a bisa ku nan ta kontribuí na krea basenan pa alkansá un akuerdo pa stòp ku bringamentu. Huntu ku e problema di minanan a manifestá ku tin un kontigente di mas di 5000 mil militar kla pa ehekutá e trabou aki i nos ta spera ku ELN no solamente ta skibi e akuerdo sino ku nan ta kolaborá kuné tambe. E tema di desaktivá e minanan ta un tema hopi tristu den historia di konfliktonan na Colombia, nan ta bisa ku despues di Afganistan, Colombia ta e pais ku mas artefakto diabóliko di e naturalesa ku ta keda sembrá den nan teritorio, asina Restrepo a sigui bisa. Tur dos grupo a bai di akuerdo ku e di dos ronda di kombersashon na e kapital ekuatoriano ku lo kuminsá dia 3 di mei. ELN a keda fundá na 1965 komo proyekto polítiko antiimperialista ku a keda inspirá den e revolushon kubano i tin mas o ménos 1500 kombatiente segun sifranan ofisial. Manera a tuma lugá ku FARC ku a negoshá ku e gobièrnu kolombiano entre novèmber 2012 i sèptèmber 2016 na Habana e diálogo a kuminsá sin a stòp ku e bringamentu p’esei a sigui e akshonnan armá.
