LONDON (AP).- Ofisialnan di Union Europeo i tambe Gran Bretaña a disidí di kontinuá ku kombersashonnan pa wak kon lo por sali for di e impase ku a surgi riba Brexit, i esei ta ménos ku kuater siman promé ku e pais aki ofisialmente ta programá pa bandoná e bloke. Ofisialnan di Union Europeo a duna di konosé ku Michael Barnier, e negosiadó prinsipal pa Brexit lo reuní ku e Sekretario di Brexit, Stephen Barclay i tambe Abogado General Geoffrey Cox.
T’asina ku segun términonan ofisial, Gran Bretaña lo tin di bandoná Union Europeo pa dia 29 di mart próksimo, pero te asina leu Parlamento Britániko a rechasá un dil entre Union Europeo i e gobièrnu di Promé Minister Britániko Theresa May, loke lo por nifiká un salida ku lo laga e pais den káos i ku dañonan ekonómiko sin presedente.
Industria di Outo:
E industria di outo ta konfrontando hopi insertidumbre di su parti. Gregory McDonald tin un preokupashon grandi miéntras e ta wak rònt den su fábrika di piesanan di outo. E ta un dje personanan ku a hinka su plaka di spar pa lanta un negoshi ku ta bende piesanan di outo, piesanan pa avion i tambe pa aparatonan médiko. Pero el a duna di konosé na AP ku e ta kla pa hasi loke sea pa e protehé su invershon.
Komo 30 porshento di su produkshon ta bai pa outo, i e no por imaginá su mes e katástrofe ku lo surgi si Gran Bretaña lo mester bandoná Union Europeo sin un akuerdo riba e parti komersial. Goodfish ta un kompania ku tin apénas nuebe aña i tin tres planta na Inglatera i tin pensá pa invertí i habri na Slovakia unda tin produkshon di outonan di marka Volkswagen, Kia, Citroen i Jaguar na rason di un mion vehíkulo pa aña.
