CARACAS (AP).- E lider di oposishon na Venezuela, Juan Guaidó, a duna di konosé ku a reta e prohibishon ku tin riba ayudo humanitario dor di manda un kantidat di medisina den e pais ku yudansa di otro paisnan den bisindario. Den un entrevista e siman aki Guaidó a duna di konosé na prensa ku e movida aki lo bira un prueba nobo pa militarnan na Venezuela, kual tin su figuranan kabesante ku ainda ta sostené e presidente sosialista Nicolás Maduro for di dia ku a kuminsá ku protestanan.
“Denter di algun siman nan lo tin di skohe si nan ta laga e yudansa ku ta asina nesesario pa drenta e pais òf si nan ta sigui na banda di Maduro”, asina Guaidó a duna di konosé. El a ofresé amnistia na miembronan di ehérsito den un esfuerso pa enkurashá nan pa bandoná e atministrashon di Maduro.
Guaidó a splika ku e yudansa pa Venezuela lo inkluí remedinan ku por salba bida di hende den e pais i ku ta hopi skars i lo ser transportá dor di vehíkulonan ku lo yega na diferente punto na frontera dje pais. E remedinan lo bini for di puertonan di paisnan bisiña. “Nos no ta simplemente tuma yudansa di Merka. Pero den e próksimo dianan nos lo anunsiá un koalishon global pa manda yudansa pa Venezuela”, asina Guaidó a duna di konosé.
