PORT-AU-PRINCE, AP.- Empresa i ofisinanan di gobièrnu a kuminsá habri djaluna na Haiti despues di protestanan violento ku a dura mas di un siman pa e oumento di preis di kuminda, kombustibel i produktonan básiko, i tambe pa akusashonnan di korupshon den gobièrnu.
Transporte públiko a reanudá su servisio na Port-au-Prince, e kapital, kaminda e residentenan a forma rei pa kumpra kuminda, awa i gasolin, miéntras ekiponan tabata limpia e kayanan ku míles di haitiano a protestá ariba pa eksihí renunsia di presidente Jovenel Moise.
Moise a ninga di renunsiá, ounke su promé minister Jean-Henry Ceant a bisa fin di siman di a aseptá pa redusí sierto presupuesto di gobièrnu ku 30%, limitá biahe di funshonarionan públiko i eliminá tur privilegio no esensial, inkluyendo karchinan di telefòn. Ademas, el a primintí di investigá e akusashonnan di malversashon vinkulá ku un programa venezolano ku a proveé krudo supsidiá na Haiti. El a pidi tribunal pa ouditá tur empresa estatal.
Sinembargo, mayoria haitiano no ta kere den e promesanan aki i tur skol tabata será djaluna, pa un posibel brote di violensia atrobe.
“E gobièrnu ta hasiendo deklarashonnan ku no ta kambiando nada aktualmente”, asina un sivil a bisa.
E inflashon na Haiti tabatin dígito dòbel desde 2014 i preisnan ta keda subi den e pais. 60% di e 10,5 mion habitantenan ta bataya pa sobreviví ku 2 dòler pa dia. un rapòrt resien di Agensia di Merka pa Desaroyo Internashonal a señalá ku mas o ménos mitar di e pais ta sufri di desnutrishon.
Un investigashon di senado haitiano a konkluí ku tabatin un malversashon di por lo ménos 14 funshonario di Michel Martelly su gobièrnu.
