SUDAN, AP.- Kasi 1,25 mion persona por muri di hamber na sùit Sudan, dòbel e kantidat di e mesun periodo aki aña pasa, asina un reportahe di gobièrnu lokal i Nashonnan Uni a revelá. E pais asotá pa guera por kai atrobe den hamber den 2018, asina gruponan humanitario i di gobièrnu a revelá.
“E falta di kuminda generalmente….ta provoká nos ku miedu di ku un hamber por surgi i e biaha aki mas grandi den sùit Sudan den 2018”, asina Katie Rochard kordinadó lokal di grupo REACH ku a yuda elaborá e informe a bisa.
Gruponan di asistensia a atribuí e krísis kresiente na e konflikto ku ta persistí den e region, ki tin 5 aña kaba den dje i ku ya 50 mil morto. Na febrüari sùit Sudan e nashon mas hóben di mundu, a anunsiá ku ya tin krísis di hamber den dos kondado di un di su provinsianan, promé biaha ku a deklará hamber den mundu for di despues di Somalia na 2011.
Den e kaso aki e dos kondadonan, algun 100 mil persona tabata kasi muri pero danki na e alerta tempran i un kontesta asina lihé a evitá un katástrofe, asina e programa di alimento mundial a sigurá.
Sinembargo, e último aktualisashon di análisis di seguridat i alimento pa parti di e ofisina nashonal di statistik di ONY i e ofisina nashonal di statistik di Sùit Sudan no ta alentado.
Na sèptèmber, 6 mion persona, 56% di e poblashon ta sufri di hamber grave di kual 25 mil sudanes a sufri un katástrofe humanitario den e kondadonan di Ayod i Baggari. E guera kresiente na Sùit Sudan a hasi imposibel e produkshon di kuminda i e entrega di yudansa ta peligroso i difísil. Ayod i Baggari ta zonanan kontrolá pa rebeldenan i e situashon den e dos kondadonan ei ta hopi grave.
