NEW YORK, MERKA, AFP.- Despues di a wòrdu kritiká pa vários republikano, inkluyendo presidente Donald Trump, e Universidat prestigioso di Harvard a anunsiá djárason ku lo no aseptá un pakete di yudansa federal di 8,6 mion dòler pa enfrentá e pandemia di coronavirus.
“Harvard no a pidi pa haña e sosten aki, i no tabatin akseso na e fondo”, segun indikashon di e universidat den un komunikado publiká riba su website. “Harvard a disidí ku lo no buska òf aseptá e fondonan kual a wòrdu otorgá”.
Vários representante republikano a kritiká e echo ku Harvard kier a gasta e fondo aki dor di yuda su studiantenan, miéntras e universidat tin un herensia di mas di 40.000 mion dòler i ta wòrdu konsiderá komo e universidat di mas riku na mundu, segun indikashon di The Harvard Crimson, e korant di e universidat.
E universidat a bisa ku dor di e pandemia, su herensia a baha ku 5.000 mion dòler. Harvard a indiká riba Twitter anteriormente, ku lo usa “100%” di e yudansa federal proveé pa lei CARES “pa atendé ku nesesidatnan urgente di studiantenan ku ta enfrentando e pandemia”.
