HERUSALEM, AFP.- E hefe di diplomasia di Israel, Yair Lapid, lo biaha pa Turkia djaweps i tin plania pa reuní ku Mevlut Cavusoglu, segun indikashon di Ministerio di Eksterior, kaminda nan lo papia di e menasanan kontra siudadanonan israelí na Istanbul.
Lapid a pidi siudadanonan israelí pa no biaha pa Turkia, spesialmente Istanbul, i pa bandoná e pais “mas pronto posibel” pa posibel atakenan iraní.
E bishita a wòrdu akordá despues di un interkambio telefóniko entre e presidentenan di Israel, Isaac Herzog, i di Turkia Tayyip Erdogan, segun un komunikado di e ministerio israelí.
“Presidente Herzog a gradisí presidente Erdogan pa su esfuersonan pa neutralisá aktividatnan terorista riba su teritorio. E menasa no a disparsé ainda pero esfuersonan den lucha antiterorista mester kontinuá”, segun e komunikado.
Prensa israelí a informá di intentonan di atakenan kontra israelínan na Turkia, ku segun e medionan, a wòrdu evitá danki na un kolaborashon entre servisio di seguridat di ámbos pais.
