WASHINGTON, AP.- Despues ku orkan Maria a daña gran kantidat di kas na Puerto Rico, un empresa lantá resientemente na Florida a gana mas di 30 mion di dòler den kontrakt di parti di e agensia federal pa maneho di emergensia di Merka FEMA pa proporshoná ròlnan di plèstik i tapol di emergensia ku ta usa den kasonan di reparashon.
E empresa Bronze Star LCC nunka a entregá e suministronan ei ku mester ku urgensia i segun luna ta bayendo e víktimanan na e isla ta sigui ku e nesesidat.
Fema eventualmente a pone fin na e kontraktnan, sin paga e sèn, i a kuminsá di nobo ku e proseso e luna aki pa proporshoná mas material pa e isla. Tur trabou anterior a tarda kasi kuater siman for di dia ku Fema a duna e kontrakt na Bronze Star te ora a kanselá esaki.
Míles di puertorikeño ta kontinuá sin lugá di biba i hopi ta keha di ku gobièrnu federal a tarda hopi pa instalá e tapolnan. E teritorio merikano a keda asotá pa vários tormenta den último simannan ku a kousa inundashonnan den vários zona di e isla.
No ta kla kon Fema a investigá Bronze Star òf su kapasidat pa kumpli ku e kontraktnan. Krea pa dos ruman na ougùstùs, Bronze Star no a gana niun pèrmit di gobièrnu ni a keda enkargá ku entrega di tapol òf ròlnan di plèstik. E direkshon di e empresa ta un kas di famia di un piso ubiká den un zona residensial na St, Cloud Florida.
E rumannan Kayon Jones a bisa ku e fabrikantenan ku nan a kontaktá promé di partisipá den e destaho a sigurá di por entregá e tapolnan, pero despues a bisa ku nan no por kumpli ku e eksigensianan di gobièrnu. Jones a señalá ku pa haña tur material tabata un problema debí ku mayoria di e materianan prima tabata bin di Houston, e siudat ku orkan Harvey a bati.
El a bisa di a buska dispensashon di Fema pa permitié ordená e tapolnan di un fábrika chines i a pidi mas tempu pero e agensia a rechasá e petishon.
Fema a kanselá e kontrakt dia 6 di novèmber asina Jones a bisa.
