OAKLAND, CALIFORNIA, MERKA, AP.- Un hues federal a prohibí gobièrnu di presidente Donald Trump di usa 2.500 mion dòler di fondo militar pa konstruí segmentonan di e muraya na frontera na California, Arizona i New México.
E hues Haywood S. Gilliam Jr., na Oakland a tuma e medidanan djabièrnè den dos demanda presentá pa estado di California i aktivistanan ku a indiká ku e transferensia di fondo ta ilegal i ku e muraya su konstrukshon ta un menasa pa medio ambiente.
“E úniko kos ku presidente Trump a logra konstruí ta un krísis konstitushonal”, segun afirmashon di e sekretario di Hustisia di California, Xavier Becerra, kende a enkabesá un koalishon di 20 estado den un demanda legal.
Trump kier desviá 6.700 mion dòler for di fondonan militar den un deklarashon di emergensia nashonal ku e presidente a hasi, pa kuminsá konstruí e muraya.
Trump a deklará e emergensia despues di a pèrdè un bataya ku Kámara di Representante, dirigí pa e demókratanan, kual a kousa un siere di gobièrnu durante 35 dia largu.
E presidente kier asigná 3.600 mion dòler di fondo militar pa konstrukshon, 2.500 mion dòler na aktividatnan kontra narkotráfiko di Departamento di Defensa entre otro.
