LONDON, AP.- Un hues britániko a ratifiká un òrdu di detenshon kontra e fundadó di WikiLeaks, Julian Assangem kende a pasa mas di sinku aña evadiendo su detenshon despues di refugiá den embahada di Ecuador na London.
Hues Emma Arbuthnot a rechasá e argumentonan di e abogadonan di Assange, indikando ku ya no ta den interes di públiko pa su kliente wòrdu detené despues di violá e términonan di su libertat bou di fiansa na 2012 i buska refugio den embahada pa evitá di wòrdu ekstraditá pa Suesia, kaminda fiskalnan tabata investigando denunsianan presentá pa dos muhé, indikando ku Assange a agredí nan seksualmente. Assange a ninga e akusashonnan.
Arbuthnot a bisa ku Assange mester paresé den korte manera kualkier otro akusado. Dor di violá e kondishonnan di su libertat di fiansa, Assange “a purba evitá e òrdu di korte”, asina e hues a bisa.
“E impreshon ku mi tin ta di un hòmber ku kier imponé su kondishonnan na e proseso di hustisia”, asina el a bisa. “Aparentemente e ta konsiderá ku e ta riba reglanan normal di lei i kier pa hustisia tuma desishonnan solamente na su fabor”.
Assange por apelá, pero su abogadonan ainda no sa si e lo hasi esaki.
E fiskalnan sueko a bandoná su investigashon aña pasa debí ku nan no a mira un posibilidat pa hiba Assange Suesia. Pero e òrdu di detenshon britániko pa violashon di e kondishonnan di fiansa ainda ta vigente, i Assange por wòrdu detené si e bandoná e embahada.
