LONDON, AP.- E hòmber ku a dal vários peaton riba un brùg na London i kende a hinka un polis mata riba tereno di Parlamento a nase na Gran Bretaña. Asina promé minister britániko a bisa. Estado Islámiko a bisa ku e atakante tabata un di su sòldatnan.
Theresa May a bisa ku anteriormente el a yega di wòrdu investigá pa posibel laso ku ekstremismo.
Polis a identifiká e agresor komo Khalid Masood, britániko di 52 aña, nasé den sùitost di e pais, residente aktualmente den sentro di Inglatera. El a bisa ku e agresor no tabata den proseso di investigashon i ku e no tin “informashon anterior tokante su intenshon di realisá un atake terorista”.
Masood a kumpli kondena pa asalto, poseshon di arma ofensivo i trastornonan di òrdu públiko.
E promé minister a hasi e deklarashonnan algu despues ku Parlamento britániko a tene un minüt di silensio i bolbe reuní den ménos di 24 ora despues di e atake brutal djárason. Esaki a laga tres víktima mortal i a pone outoridat sera e sede di poder di gobièrnu britániko.
May a ofresé un diskurso desafiante dilanti di Kámara di Komun, kaminda el a afirmá: “nos no tin miedu”.
Despues ku e agresor a kometé e akto aki kontra británikonan, polis a tir’é mata.
