SACRAMENTO, CALIFORNIA, MERKA,AP.- Legisladornan demókrata di California a aprobá un inisiativa di “estado santuario” kual su intenshon ta pa restringí koperashon di polis lokal i estatal ku outoridat di inmigrashon. Esaki a enfurese funshonarionan federal ku a afirmá ku e inisiativa ta kontra seguridat públiko.
Ku e aprobashon di djasabra di e proposishon, konosí komo SB-54, e legisladornan kier protehá inmigrantenan den e estado.
E inisiativa ta bai wòrdu pone den konsiderashon di gobernador Jerry Brown, kende a anunsiá su sosten despues ku e lider prinsipal di Senado a aseptá pa suavisá i respetá outoridat di funshonarionan di prizònnan pa kooperá ku agentenan di inmigrashon den mayoria kaso.
E proyekto di lei ta e esfuerso mas resien di legisladornan demókrata na California pa opstakulisá e kompromiso di kampaña di presidente Donald Trump di intensifiká deportashon.
E legisladornan a aprobá rekurso pa asistensia hurídiko i bekanan universitario pa personanan ku ta sin pèrmit den Merka.
E legisladornan di California ta debatí e medida miéntras Kongreso federal kier ofresé status legal na inmigrantenan hóben kende nan tata a trese nan di forma ilegal den e pais òf esnan ku a keda apesar ku nan visa a kaduká.
