BAGDAD, AP.- Irak a selebrá e aniversario di su viktoria kostoso kontra Estado Islámiko, kual a pèrdè e teritorio praktikamente kompleto di kual e grupo tabatin kontròl. Pero ainda tin atakenan sporádiko pa mantené su último enklave na Siria serka di e frontera irakí.
E gobièrnu a deklará e viktoria den desèmber despues di un guera di tres aña kaminda míles di persona a muri i míles a wòrdu desplasá. Durante e lucha, pueblo i barionan kompleto a wòrdu redusí na ruina.
E gobièrnu a deklará djaluna komo un dia nashonal festivo i a plania un momentu di silensio. Puntonan di revishon den e kapital a wòrdu dekorá ku bandera irakí, miéntras forsanan di seguridat tabata patruya riba kaya, reprodusiendo músika patriótiko.
Komo parti di e fiestanan, outoridat a plania pa habri partinan di e Zona Berda fortifiká na Bagdad. E zona ta sede di ofisinanan gubernamental i embahadanan. E medida a wòrdu kategorisá komo un akto di transparensia despues di vários protesta kontra korupshon i servisio públiko defisiente.
E selebrashonnan a tuma lugá na momentu ku e konfliktonan interno a difikultá e formashon di un gobièrnu i establesimentu di e presupuesto anual meimei di un situashon ekonómiko grave.
