TEHRAN, IRAN, AFP.- Iran a bai di akuerdo djárason pa duna Nashon Uni akseso ku esaki a pidi pa bishita dos sitio nuklear, despues ku e direktor di e agensia a bishita Tehran pa promé biaha.
E anunsio a bira konosí despues ku Nashon Uni a ninga Merka ku lo bolbe pone sanshon kontra e Repúblika Islámiko. Iran a firma un akuerdo na aña 2015 kaminda e pais lo kontené su programa nuklear a kambio di ménos sanshon.
E akuerdo yama Joint Comprehensive Plan òf Action (JCPOA) i a wòrdu firma ku diferente pais, pero Presidente Donald Trump a retirá unilateralmente di e akuerdo na aña 2018.
Iran a tuma vengansa redusiendo su kompromiso ku e akuerdo JCPOA gradualmente desde ku Merka a sali.
Pero e pais a bai di akuerdo pa International Atomic Energy Agency (IAEA) haña akseso na dos sitio kaminda tin sospecho di aktividatnan pekuliar desde komienso di aña 2000. E pais a hasi e anunsio despues ku e direktor general di IAEA a bishita Iran.
Iran i IAEA a akordá un fecha kaminda funshonarionan lo haña akseso na e sitio pa verifiká e aktividatnan ku ta tuma lugá einan.