MUNICH, AP.- Un minister di Iran a bisa djadumingu ku e europeonan mester hasi mas ku djis papia, si nan kier mantené e akuerdo ku ta impedí Tehran di haña arma nuklear despues di e retirada unilateral di Merka. El a agregá ku Washington ta e “fuente di destabilisashon den Medio Oriente”.
Mohammad Javad Zarif a bisa den un reunion di lidernan mundial, funshonarionan di defensa i diplomátikonan ku e sistema konosí komo INSTEX, no ta sufisiente. Esaki a wòrdu kreá pa Fransia, Alemania i Gran Bretaña pa permití e empresanan pa negoshá direktamente ku Iran i asina evitá di enfrentá e sanshonnan merikano kontra e pais.
Tantu e tres nashonnan europeo komo Rusia, China i Union Europeo komo bloke, a pasa trabou pa salba e akuerdo nuklear di 2015 ku Iran desde ku e presidente merikano Donald Trump a anunsiá e retirada unilateral di Merka aña pasá. E akuerdo ta limitá e sanshonnan kontra Iran si e pais tambe limitá su programa nuklear. Te ainda Agensia di Energia Atómiko a bisa ku Tehran a kumpli ku su obligashonnan.
Djasabra, e visepresidente merikano Mike Pence a kritiká INSTEX i a pidi e otro paisnan pa bandoná e akuerdo nuklear.
