CARACAS, AP.- Tres avion di forsa militar merikano ku ta transportá yudansa humanitario pa Venezuela a aterisá den e siudat kolombiano Cucuta djasabra. Esaki ta parti di un plan nobo, motivá pa oposishon venezolano ku sosten di Washington. Esaki ta un desafio evidente kontra e gobièrnu di presidente Nicolás Maduro, kende ta rechasá e inisiativa.
E promé tres avionnan militar C-17, ku tonelada di yudansa, a yega e aeropuerto internashonal Camilo Daza den siudat di Cucuta, na frontera ku Venezuela, kaminda tin un di e kuater sentronan internashonal pa warda e entrega humanitario.
E segundo i terser avionnan a yega kasi dos ora despues. E tres avionnan a sali djasabra mainta di un base di Forsa Aéreo di Merka na Homestead, Florida.
E avionnan ta transportá diferente kaha di Agensia di Merka pa desaroyo Internashonal kual a hasi un donashon na e gobièrnu merikano pa sostené e inisiativa promové pa Asamblea Nashonal di Venezuela, di mayoria opositor.
Guaidó, kende ta hefe di Asamblea Nashonal di Venezuela, a anunsiá ku a habri un di kuater sentro ku yudansa humanitario na Miami.
E lider opositor a anunsiá djasabra ku lo forma un brigada di aktivista pa mobilisá karavananan te na frontera i asina yuda entregá e artíkulonan desde djasabra awor. E hefe di Asamblea nashonal a hasi un petishon nobo na forsa arma pa permití e entrada di produktonan humanitario den e pais.
Maduro a deskartá di permití entrada di e karga di alimento i remedi, indikando ku nan ta kontaminá i kanseroso, ounke e no a duna prueba pa esaki.
