LAHORE, PAKISTAN (AP).- Míles di islamista di e partido fuerte ayera a bai e kapital pakistani den un karavana masal di vehíkulonan pa protestá kontra e desishon di e gobièrnu di permití Merka i su aliadonan di OTAN reanudá e mandamentu di provishonnan militar atraves di e pais ku direkshon e bisiña Afganistan.
Konseho Difah-e- Pakistan ( Defensa di Pakistan), un grupo di lidernan polítiko i religioso ku tabata e krítikonan mas enérgiko di e rutanan di suministro, a organisá e manifestashon, ku a kuminsá den e siudat Lahore na ost di e pais.
Pakistan a sera e ruta na novèmber den represaya pa e atakenan aéreo merikano ku a mata 24 sòldá di ehérsito pakistani. Despues di lunanan di negosiashon, Islamabad finalmente a akordá bolbe habri e ruta siman pasá despues ku e sekretaria di estado Hillary Rodham Clinton a pidi diskulpa pa e mortonan.
Durante un konferensia di yudansa pa Afganistan na Tokio, Clinton a reuní ayera ku e minister di Asuntunan Eksterior pakistani Hina Rabbani Khar.
Un di e motibunan pa kua Pakistan a warda tantu pa resolvé e konflikto ta ku e gobièrnu tabata preokupá pa e reakshon interno den un pais kaminda e estado di ánimo anti-merikano ta generalisá apesar di míles di miónes di dòler na yudansa di parti di Merka durante e último dékada.
E protesta a kuminsá ayera den sentro di Lahore, kaminda vários míles di persona a reuní huntu ku hopi bùs, outo, i motosaikel. Nan a djòin otro míles di simpatisante mas ku a spera pafó di e siudat promé di a bai direkshon Islamabad den un asina yamá ‘marcha largu’ den kontra di e ruta di suministro. E karavana a inkluí kasi 200 vehíkulo ku a transportá mas o ménos 8.000 persona ora el a sali di Lahore, asina polis a bisa.
