HERUSALEM, INDEFINI, AFP.- Israel a anunsiá djabièrnè ku lo adoptá sanshonnan kontra Outoridat Palestino komo represaya pa su inisiativa resien pa Nashonnan Uní tuma un desishon riba e okupashon di Israel riba teritorionan palestino.
E sanshonnan a keda tumá durante e promé reunion di e gabinete di seguridat di e gobièrnu israelí nobo, dirigí pa e konservador Benjamin Netanyahu i ku ta inkluí vários minister derechista.
E gobièrnu lo destiná 39,6 mion dòler pa indemnisashon di víktimanan di atakenan palestino. E plaka ta prosedente di kostonan di duana ku Israel lo haña di Outoridat Palestino, segun indikashon di e gabinete di Netanyahu den un komunikado.
Israel lo tene tur otro fondonan di Outoridat Palestino te ora esaki yega un kantidat ekivalente na loke e gobièrnu palestino a duna na “teroristanan i nan famianan” na aña 2022, segun indikashon di e gobièrnu israelí, sin indiká un kantidat eksakto.
E gabinete di seguridat israelí tambe a disidí ku lo kongelá tur proyekto di konstrukshon palestino den algun zona di Wèst Bank, okupá pa Israel desde 1967.
