PALESTINA (AFP).- Israel ayera tabata den alerta, despues ku Iran a menasá ku represayanan pa e bombardeo di siman pasá di su konsulado na Siria, miéntras ku e negosiashonnan pa wanta ku e guera na Gaza a sigui sin resultado.
Bombardeo israelí riba Gaza a laga 63 morto durante dia di ayera, segun e ministerio di salú dje teritorio palestino.
Konseho di Seguridat di Nashonnan Uní ayera a referí na e “situashon humanitario katastrófiko” den Gaza, kaminda sivilnan ta biba ku menasa di muri di hamber, i a tuma nota dje anunsio di Israel ku nan ta bin ku mas medida.
E guera entre Israel i e movementu islamita palestino, ku ya a dura seis luna, a provoká un episodio nobo di tenshon den e region.
Merka a atvertí Israel pa e peliger di un atake iraní òf di su gruponan den Medio Oriente (Irak, Siria, Libanon, Yemen) komo kontesta dje bombardeo kontra e konsulado di Teherán na Damaskos, den kua dia 1 di aprel a mata shete miembro di Guardiannan di Revolushon, dos di nan general.
Djárason, e guia supremo iraní, ayatola Ali Jamenei, a bolbe menasá Israel públikamente Israel no a konfirmá di ta outor dje atake riba konsulado iraní afirmando ku “lo nan keda kastigá”.
E kansier israelí, Israel Katz, a respondé lihé bisando ku “si Iran ataká for di su teritorio, Israel lo respondé i lo ataká Iran”.
Rusia i Alemania djaweps a pidi moderashon pa evitá ku e situashon ta eskalá den Medio Oriente. Einan, gruponan pro Iran ta realisando atentadonan kontra ophetivonan israelí i merikano den apoyo na Hamas. Israel, di su parti, a intensifiká su atakenan den Siria, kaminda ta ataká gruponan pro iraní manera Hezbolá libanes.
“Nos ta meimei di un guera den Gaza, ku ta sigui ku tur velosidat. Pero tambe nos ta preparando pa otro esenarionan”, segun Netanyahu a bisa ayera. “Nos ta kla tantu pa defensa komo pa atake”, segun el a bisa.
