ROMA, AP.- Italia a superá China ofisialmente komo e pais ku mas morto komo konsekuensia di coronavirus. 3.405 persona a muri den un ilustrashon dramátiko tokante e forma kon e pandemia a alkansá Europa i Merka. Tantu e kantidat di infekshon komo e kantidat di morto a oumentá den Europa.
Italia, un pais ku 60 mion persona, a registrá 427 morto i 5.322 infekshon adishonal djaweps. China tin un poblashon di 1.400 mion persona.
Te ainda, Italia a registrá 41.035 infekshon, mas di mitar di e total mundial.
E sistema di salú italiano a wòrdu abrumá pa e krísis. Un delegashon di Krus Kora ku a bishitá Italia a kritiká e echo ku e italianonan no ta aislando i no ta tumando e medidanan di prekoushon na serio.
Paralelamente, e siudat kaminda e pandemia a originá, Wuhan na China, no a registrá ningun kaso adishonal djaweps.
Aworakí China tin 3.249 morto kousá pa coronavirus, 156 ménos ku Italia, segun ekspertonan di Universidat Johns Hopkins.
Nashon Uní i outoridat di salú italiano a señalá vários motibu pa e sifra haltu di morto na Italia. E pais su poblashon ansiano ta haltu, kual ta e grupo di rísiko ku por desaroyá komplikashonnan grave pa e vírus.
Italia tin e segundo poblashon ansiano mas haltu na mundu despues di Hapon. Gran mayoria di morto, 87% a riba 70 aña.
E kantidat di morto rònt mundu a yega 10.000 ku mas di 220.000 infekshon, inkluyendo 85.000 persona ku ya a rekuperá.
E promé minister franses, Edouard Philippe, a pidi tur hende pa mantené distansia di otro pa para propagashon di e vírus, apesar ku mayoria kier buska òf duna konsuelo.
Na Merka, gran mayoria di e 149 mortonan tabata ansiano. Aparte di e ansianonan i personanan ku enfermedat kaba, mayoria hende ta sufri síntomanan leve òf moderá manera keintura i tosamentu.
Despues di Italia, e pais mas kastigá pa e pandemia ta Spaña, ku 17.000 kaso reportá te ku djaweps, kasi mitar di nan ta den e kapital, Madrid.
Na London, kaminda 9 mion persona ta biba, outoridat a pidi tur hende pa evitá di usa transporte públiko miéntras outoridat ta studia medidanan mas fuerte pa reforsá distansiamentu sosial. London ta e zona mas afektá den e pais ku mas o ménos un terser di su 2.644 kasonan.
