ROMA, AP.- E kantidat total di kasonan konosí di Italia di COVID-19 a superá Surkorea, kombirtiendo e den e segundo pais ku mas kaso di infekshon despues di China.
Italia tin 7.375 kaso. Esaki ta 62 mas ku Surkorea. China tin mas di 80.000 kaso. Mayoria morto i kasonan na Italia a sosodé na Lombardia.
E minister di salú di Alemania a pidi tur organisadó di evento pa posponé tur akto públiko ku partisipashon di mas di 1.000 persona pa para propagashon di e vírus.
Jens Spahn a informá ku e organisadónan ta kontinuando ku demasiado evento manera weganan deportivo, konsiertonan i ferianan komersial.
Vatikano a anunsiá djadumingu ku lo sera tur su museonan, inkluyendo Kapia Sistine te ku 3 di aprel. E dak di e kapia, ku pinturanan di Michelangelo, ta un di e atrakshonnan turístiko mas grandi na mundu. E desishon pa sera e sitionan temporalmente ta un golpe fuerte pa e sektor turístiko di Italia.
Gresia lo efektuá tur evento deportivo sin ekspektador durante e próksimo dos simannan pa yuda prevení e propagashon di coronavirus.
Te ainda a identifiká 66 kaso di e vírus na Gresia i ningun morto.