WILLEMSTAD.- A kuminsá un kampaña agresivo pa bende Kòrsou na Brasil, un di e merkadonan ku nos isla ta enfoká riba dje pa kresementu di turismo. Den e kampaña ku a kuminsá e siman aki kada agente di biahe ku bende un pasashi pa Kòrsou lo haña un voucher di 50 dòler, basta ku e benta pasa via di e agensia Flytour Viagens. E kampaña ta konta pa henter Brasil.
A lansa e kampaña den koperashon ku Kòrsou ku e intenshon pa oumentá e presensia di brasileronan na Kòrsou ku 30 porshento. Lo pasa e suma di 50 dòler pa e agensia via di un tarheta di krédito. E agensia mes por us’é na su eskoho ku eksepshon di kèsh. E suma ta konta pa un estadia di tres anochi i ta konta pa kada hende ku hasi un reservashon pa Kòrsou. “Si un agensia bende un reservashon ku kuater pasahero, e lo haña 200 dòler total”, asina e direktor di Suramérika, Caribe i produktonan di Cruise di e agensia di biahe Marcelo Paolillo a bisa. “E promoshon ta eksklusivo pa e koperashon entre Kòrsou i Flytour Viagens i ta válido solamente pa esun ku bende Kòrsou ku e operador aki”, asina Paollilo a bisa.
E kampaña a haña e nòmber Flytour Viagens i Curaçao: Vendeu, Ganhou. Segun Paolillo, e kampaña ta un bon oportunidat pa pasaheronan ku ya kaba konosé Punta Cana i Cancún. “Kòrsou tin un otro atmósfera den Caribe ku su arkitektura estilo ulandes, kasino, playanan bunita, gastronomia di bon kalidat i bida nokturno vibrante. Banda di esei, hotèlnan i e infrastruktura en general ta hasi e bishita mas mihó ainda. Ta un lugá ku ta kombiná sosiegu i plaser”, asina el a bisa.
Mas aleu a informá ku Kòrsou lo ta presente tambe na e edishonnan di e aña aki di Hyper Feirão de Viagens Flytour, ku lo tuma lugá na Santos (Sao Paolo) dia 22 pa 24 di sèptèmber i na Campinas, tambe na Sao Paolo, di 6 pa 8 di òktober. “Kòrsou lo ta bon representá na e feria ku un stènt spesial ku video i otro aspektonan spesial. Presidente di Flytour Travel, Michael Barkoczy a bisa ku huntu ku Kòrsou lo logra e metanan ku a pone riba mesa.
Pa algun aña kaba Kòrsou ta dedikando atenshon na e merkado di Brasil, un tempu un merkado ku a krese ekonómikamente masha fuerte. Ultimamente e pais a bai ekonómikamente atras. Pa un òf otro manera no a logra tòg loke a premirá. Un di e aspektonan ku a hunga un ròl te aworakí ta falta di konekshon aéreo.
