LONDON, AP.- Un kandela ku a kuminsá durante oranan di anochi a destrosá un edifisio residensial di 24 piso na London djárason i a mata sigur 12 persona i leshoná 79 segun informashon di Polis. Testigunan a bisa ku a mira algun residente tira beibi i muchanan via bentana pa hendenan riba asera, den un intento desesperá pa salba nan di e kandela.
Outoridat a informá ku e kantidat di víktima por oumentá, ya ku 18 persona su kondishon ta kritiko.
Mas di 200 bombero tabata kombatí e kandela den Grenfell Tower North Kensington.
Personanan pega pa kandela i huma tabata kibra bentana i pidi yudansa miéntras vários tabata para riba asera ta mira, segun sobrebibiente i testigunan. Un di e bisiñanan a bisa ku e no a skucha e alarma di kandela.
“Nunka mi no a mira nada paresido na e insidente, i el a rekordá mi di 11 di sèptèmber”, segun Muna Ali refiriendo na e atakenan kontra Twin Towers di New York na aña 2001. “E kandela a kuminsá den e pisonan mas haltu i a ekstendé masha lihé. Den mei ora e kandela a ekstendé tur kaminda”.
Outoridat no a informá mesora tokante kousa di e kandela, pero bisiñanan furioso a bisa ku nan a pone outoridat na altura di e problemanan di Grenfell Tower. E edifisio di kas supsidiá di 120 apartamento a wòrdu konstruí na 1974 i remodelá ku un kosto di 11 mion dòler na 2016, segun alkalde di Royal Borough òf Kensington and Chelsea.