LOS ANGELES, AP.- Tres persona a fayesé e siman aki debí na vários kandela den selvanan na sùit di California, segun indikashon di outoridat djasabra. Un disminushon di bientu a permití bomberonan pa kontené e kandela ku a daña òf destruí mas di 30 struktura for di Los Angeles, ounke tabatin huma ku a afektá diferente besindario.
Outoridat di Los Angeles a bisa ku e kandela den zona di Valle di San Fernando den e siudat no a oumentá konsiderablemente desde djabièrnè i ku ekiponan di reskate tabata pagando kandela na diferente punto persistente.
E òrdunan di evakuashon a wòrdu kanselá gradualmente pa sierto parti di Los Angeles i kondado Riverside, kaminda tabatin un di dos kandela ta kima.
Alkalde di Los Angeles, Eric Garcetti, a pidi habitantenan pa tuma prekoushon miéntras ku ekiponan di reskate ta sigui kombatí e kandela. Un persona ku a purba yuda kombatí e kandela a fayesé debí na un atake di kurason i un bombero a sufri un kemadura chikitu na su wowo, segun informashon di prensa.
E kousa di e kandela ta bou di investigashon i outoridat a atvertí ku ainda tin peliger pa mas kandela aparesé.
