TALLAHASSEE, FLORIDA, MERKA, AP.- Un kandela ku a propagá rápidamente i a konsumí un komunidat na kosta na nort di Florida a destruí 36 kas, a start komo un kandela kontrolá di un agensia kontratá pa estado, segun indikashon di outoridat djárason.
Otro kasonan a wòrdu eliminá, inkluyendo welek, kandela intenshonal òf kousa aksidental, segun informashon di e komishonado di Agrikultura, Adam Putnam.
“Mi pensamentunan ta ku esnan afektá pa e kandela aki i mi ta gradesí tur esnan ku a partisipá den e esfuersonan pa para e propagashon di e kandela”, asina Putnam a bisa den un komunikado.
E desaster a start djaluna atardi na Eastpoint, serka di e pueblo históriko di Apalachicola den Florida. Outoridat a evakuá e área i ningun persona a muri komo resultado direkto di e kandela, pero e residentenan lokal a pèrdè tur kos.
E kandela a kima 320 hèktar i a pone ku outoridat mester a suspendé e práktika di kandela kontrolá den e estado miéntras tabata investigá e insidente. E práktikanan di kandela kontrolá ta wòrdu usá komo un forma pa kuida mondinan, kual ta inkluí kimamentu di mata seku pa asina evitá riesgo di kandela den futuro.
