LONDON, REINO UNI, AFP.- Reino Uní a anunsiá djamars ku e ministernan di Eksterior di G7 lo reuní pa promé biaha den dos aña.
E último reuní personal di e kansiernan di ekonomianan prinsipal di mundu a tuma lugá na Dinard, na nortost di Fransia den aprel 2019. Debí na e pandemia tur kontakto a sigui ‘online’ despues di e fecha aki.
E reunion ta tuma lugá na London entre 3 i 5 di mei i lo apliká medidanan estrikto di seguridat kontra COVID, kual ta inkluí tèstnan diario, segun indikashon di e minister di Eksterior britániko Dominic Raab.
Esaki ta un oportunidat krusial pa revitalisá diplomasia personal segun indikashon di su ministerio den un komunikado.
Akseso di muchanan muhé na edukashon, finansiashon di proyektonan di klima i formanan pa kombatí hamber i inseguridat di alimentashon tambe ta figurá entre temanan ku lo atendé.
