SULAWESI.- Un dia despues ku e isla indones Sulawesi a keda konfrontá ku vários temblor i un sunami, outoridatnan no por duna un bista kla kon grandi e daño ta despues di e desaster natural. E kantidat di morto te na e momentunan aki, awe djasabra mainta, ta 384 pero e sentro di kordinashon di desaster indones ta kere ku e kantidat di morto lo oumentá.
Te kaminda ta konosí, e gran mayoria di hende ku a pèrdè nan bida ta den e siudat Palu. Einan un sunami ku olanan di por lo ménos 2 meter haltu a yega kosta ayera djabièrnè.
E desaster a kibra tur liña di komunikashon, loke ta hasi mas difísil pa determiná e kantidat di víktima. Te ainda tin un siudat ku ta kompletamente isolá despues di e desaster natural, esei ta Donggale. Tin alrededor di 300.000 habitante den e siudat ei. Hospitalnan tin man yen pa atendé ku e gran kantidat di víktimanan.
