BOGOTA, AP.- Polis kolombiano a revelá resientemente ku Klan di Golfo, un kartel ku tin su propio ehérsito gueriero den Colombia, a ofresé un rekompensa di 7.000 dòler pa esun ku mata òf kapturá un kachó di polis.
Esaki ta e historia di un kachó anti narkótiko ku un preis riba su kabes.
Sombra ta un “German Shepherd” di seis aña, ku a yuda polis di Colombia detektá mas di 2.000 kilo di kokaina skonde den maleta, barku i karganan grandi di fruta.
Pero konforme e kachó su ruta pa kibra un rèkòrt di konfiská, el a kombertí den e ophetivo mas resien di e grupo narkotrafikante mas poderoso na Colombia.
Despues di e menasa, agentenan mester a remplasá Sombra di un punto hopi transitá na e kosta karibense di Colombia pa e kapital. Akinan e ta usa su talento ekstraordinario pa hole atraves di paketenan sospechoso den aeropuerto internashonal El Dorado di Bogotá.
Na final di su dia di seis ora, Sombra ta wòrdu transportá den un trùk ku bentana ‘bulleproof’. E ta wòrdu eskoltá pa dos wardadó arma.
E abilidatnan di Sombra ta mas nesesario ku nunka ya ku polis kolombiano ta luchando kontra e produkshon kresiente di kokaina. Un informe resien di Kas Blanku a determiná ku e kantidat di tera kaminda e agrikultor i narkotrafikantenan ta kultivá e mata usá pa kokaina a oumentá ku 11% den 2017, apesar di e 10.000 mion dòler di Merka destiná pa e kampaña anti narkótiko.
Sombra a deskubrí mas di sinku tonelada di kokaina di Klan di Golfo destiná pa Europa i skondí den kaha di bakoba. E agentenan ta duna krédito na su nanishi inkreibel pa sòru pa 245 aresto relashoná ku droga den dos di e hafnan mas grandi di Europa.
