VIENTIANE, LAOS, AP.- Presidente Barack Obama no ta bai reuní ku e mandatario filipino, Rodrigo Duterte den un reunion di Asosiashon di nashonnan di Sùitost Asiátiko kual ta tuma lugá na Laos. Asina kas Blanku a informá.
Obama i Duterte mester a reuní djamars den e kumbre regional aki. E presidente filipino ta bou di keho mundial debí na ehekushon di mas di 2.000 supuesto narkotrafikante i drogadikto desde ku el a tuma kargo. Obama a señalá ku e lo toka e tema aki.
Pero Duterte a bisa ku si Obama kuestion’é relashoná ku e ehekushonnan ekstrahudisial, e lo no aseptá esaki. Ademas, el a usa lenguahe insolente, insultando Obama.
Ned Price, bosero di Konseho di Seguridat Nashonal a bisa ku na lugá di reuní ku Duterte, Obama lo reuní ku e presidente surkoreano park Geun-hye.
